Okkar þjónusta

Við erum Sigursetrið, fyrirtæki með þjónustu fyrir foreldra og/eða forráðamenn, börn, unglinga og ungmenni sem eru að takast á við flókin og krefjandi verkefni í námi og í daglegu lífi.

Hlutverk Sigursetursins er að bjóða fjölskyldum upp á ráðgjöf og fjölbreytt úrræði til að leysa námslegar, hegðunarlegar, tilfinningalegar og félagslegar áskoranir sem börn, unglingar og ungmenni glíma við í skóla og/eða heima fyrir. Hvert lítið skref er stór sigur í átt að betri líðan.

Við bjóðum upp á úrlestur greininga þar sem við förum yfir greininguna með foreldrum og gefum einstaklingsmiðaða ráðgjöf. Í kjölfarið útfærum við aðgerðaráætlun með markmiðum í einstaklingsbundnum og sérsniðnum úrræðum. Eins setjum við upp mælikvarða á því hvernig við metum árangur af úrræðinu. Neðar á þessari síðu er að finna yfirlit yfir þá flokka af úrræðum sem standa til boða hjá okkur. Yfirlitið er ekki tæmandi. Best er að bóka tíma í ráðgjöf hjá okkur. Ef lausnin er ekki til þá einfaldlega búum við hana til!

Úrræði

Úrlestur greininga

Er barnið eða unglingurinn með formlega greiningu? Virðist lítið ágengt í skóla, heima eða í hegðun?

Við förum yfir greininguna með foreldrum og gefum einstaklingsmiðaða ráðgjöf og sérsniðin úrræði.

Þjálfun og úrvinnsla

Hvernig er lesið úr greiningum og úrvinnsla gagna einstaklingsmiðuð? Hvað þýða þessir F kóðar og skipta þeir máli?

Hver einstaklingur er misjafn þó greiningar geti hljóðað upp á sömu niðurstöðu. Þess vegna þarf að miða við einstaklingsbunda getu, úrvinnslu á áreiti og skoða hvað veldur erfiðleikum í daglegu lífi.

Við tökum að okkur að útbúa aðgerðaráætlun og/eða vinna aðgerðir úr einstaklingsnámskrá og gera sjónrænt skipulag sem foreldrar geta fylgt eftir heima fyrir og þjálfað.

Hegðunarmótun

Hefur þú áhyggjur af hegðun barnsins þíns, unglings eða ungmennis? Vantar þig ráðgjöf, styrk og/eða verkfæri í hendurnar til þess að takast á við erfiða hegðun í fari barnsins þíns?

Hegðun er hægt að móta með íhlutun, þjálfun og markvissum aðgerðum og þannig breyta henni við ólíkar aðstæður.

Við bjóðum upp á ráðgjöf, fræðslu og úrræði sem hægt er að beita heima fyrir þegar kemur að íhlutun í hegðun til þess að bregðast við hegðunarvanda og setja mörk.

Markviss málörvun

Er seinkun á tali barnsins þíns? Er grunur um tal- og/eða málþroskaröskun? Hefur jafnvel nú þegar verið staðfest með greiningu málþroskafrávik?

Markviss málörvun felur í sér að örva og þjálfa barn í tali með markvissum hætti m.a. í gegnum leik, söng, lestur, í endurtekningu á orðum og í samskiptum þar sem orðaforði er markvisst nýttur á fjölbreyttan hátt til þess að festa í minni barnsins.

Við bjóðum upp á ráðgjöf og áskriftarleið sem nýtist til markvissrar málörvunar fyrir börn og unglinga.

Námsúrræði

Á barnið, unglingurinn eða ungmennið þitt erfitt með að mæta í skólann? Er jafnvel um skólaforðun að ræða? Glímir það við veikindi af einhverju tagi sem kemur í veg fyrir að það geti stundað nám í heimaskóla sínum? Á barnið þitt rétt á heimakennslu? Vantar þig einfaldlega námsúrræði fyrir barnið þitt?

Við hjá Sigursetrinu erum með áralanga reynslu í að kenna og þjónusta nemendur sem vantar sértæk úrræði í námi. Jóhanna hefur sjálf sinnt heimakennslu fyrir Reykjanesbæ.

Við bjóðum upp á ráðgjöf og áskriftarleið sem getur nýst til heima- og/eða einkakennslu. Athugið rétt barnsins ykkar á skólaúrræði og hvort sveitarfélagið ykkar greiði slíkt úrræði geti ekki heimaskóli barnsins útvegað það.

Tákn með tali (TMT)

Er notast við tákn með tali í samskiptum við barnið þitt í skólanum? Vantar þig þjálfun í að nota tákn með tali heima og/eða vantar þig samskonar TMT spjöld heima?

Við tökum að okkur að kenna foreldrum og/eða forráðamönnum, stuðningsfulltrúum og liðveitendum Tákn með tali. Eins tökum við að okkur að útbúa myndirnar, setja saman möppu yfir þau tákn sem þarf að nota og útbúa lyklakippuhring sem hægt er að nota í helstu aðstæðum heima fyrir og í tómstunda- og frístundastarfi.